Pro 21 | NdeIBE | STEP | Inhliziyo yenkosi isezandleni zikaJehova, uyiholela lapho athanda khona njengomsele wamanzi.

Proverbs 21

1 Inhliziyo yenkosi isezandleni zikaJehova, uyiholela lapho athanda khona njengomsele wamanzi.

2 Umuntu ubona kungathi zonke izindlela zakhe zilungile, kodwa uJehova uhlola inhliziyo.

3 Ukwenza okulungileyo lokufaneleyo kuyathandeka kuJehova kulomhlatshelo.

4 Amehlo okuzikhukhumeza lenhliziyo ezigqajayo, okuyikho okukhokhela ababi, konke yizono!

5 Amalungiselelo abakhutheleyo anika umvuzo njengoba nje amawala eletha ubuyanga.

6 Inotho ezuzwe ngendlela yamanga iyinkungu ememethekayo lomjibila wokufa.

7 Ukuhlukuluza kwababi kuzabakhukhula, ngokuba bayala ukwenza okulungileyo.

8 Indlela yomuntu olecala iyathubeleza, kodwa ukwenza kongelalo kuqondile.

9 Kungcono ukuhlala mazonzo ephahleni lwendlu kulokuhlala ndlu yinye lomfazi olenkani.

10 Umuntu omubi utshisekela ububi; kalasihawu ngomakhelwana wakhe.

11 Nxa kujeziswa isedeleli isithutha sizuza ukuhlakanipha; nxa ohlakaniphileyo eqondiswa uzuza ulwazi.

12 UNkulunkulu ongukuLunga uyananzelela indlu yesigangi kuthi lesosigangi asibhubhise.

13 Uma umuntu egcika izindlebe zakhe ukuze angezwa ukukhala kwabayanga, laye uzakuthi esekhala angalalelwa muntu.

14 Isipho esiphiwa ensitha siyaludedisa ulaka, lesivalamlomo esifihlwe emakhukhwini siyakudedisa ukuthukuthela.

15 Ukwahlulela kuhle kuthokozisa olungileyo kodwa izigangi kuzitshayisa uvalo.

16 Umuntu ophambuka endleleni yokuzwisisa ucina esendawonye labafileyo.

17 Lowo othanda ukuzithokozisa uzakuba ngumyanga; laloba ngubani othanda iwayini lezibondlo ngeke anothe.

18 Ababi baba ngumhlawulelo wabalungileyo, labangathembekanga bangumhlawulelo wabaqotho.

19 Kungcono ukuhlala enkangala kulokuhlala lomfazi olenkani lolicaphucaphu.

20 Indlu yohlakaniphileyo igcwele amaqubaquba ezibiliboco lamafutha, kodwa umuntu oyisithutha udla aqede du konke alakho.

21 Lowo odinga ukuhlakanipha lothando uzuza ukuphila, ukuphumelela lodumo.

22 Umuntu ohlakaniphileyo uhlasela umuzi wabalamandla adilizele phansi inqaba abayithembileyo.

23 Lowo oqaphela umlomo wakhe lolimi lwakhe uyaziphephisa ezingozini.

24 Umuntu ozigqajayo loyisiqholo ibizo lakhe ngu “Sedeleli,” wenza izinto ngokuziqakisa okukhulu.

25 Izinkanuko zevila yizo ezililimazayo, ngoba izandla zalo ziyala ukusebenza.

26 Ilanga lonke litshona lifisa okungapheliyo, kodwa abalungileyo bayapha bengagodli.

27 Umhlatshelo wababi uyisinengiso – kambe mubi kangakanani uma ulethwa ngenhliziyo embi.

28 Ufakazi wamanga uzabhubha, kuthi lowo omlalelayo uzabhujiswa lanini.

29 Umuntu omubi utshengisa isibindi samanga, kodwa umuntu oqotho uyananzelela izenzo zakhe.

30 Akulakuhlakanipha, akulambono, akulacebo lakuphi okunganqoba uJehova.

31 Ibhiza liyalungiselelwa usuku lwempi, kodwa ukunqoba kulawulwa nguJehova.